જામનગર શહેરના વિકાસને મળશે નવી ગતિ: મનપામાં આરતી કાન્વર વહીવટદાર તરીકે નિમાયા

રાજ્ય સરકાર દ્વારા રાજ્યની છ મહાનગરપાલિકાઓનો કાર્યકાળ પૂર્ણ થતાં વહીવટદારોની નિમણૂક કરવામાં આવી છે. આ અનુસંધાને જામનગર મહાનગરપાલિકામાં વહીવટદાર તરીકે આરતી કાન્વરની નિમણૂક કરવામાં આવી છે. રાજ્ય સરકારના આ નિર્ણયથી શહેરના વિકાસકાર્યોને વધુ ગતિ મળશે તેવી આશા વ્યક્ત કરવામાં આવી રહી છે. મહાનગરપાલિકાના ચૂંટાયેલા સભ્યોનો કાર્યકાળ પૂર્ણ થતાં આગામી મનપા ચૂંટણી સુધી શહેરની તમામ વહીવટી કામગીરી હવે વહીવટદાર દ્વારા સંચાલિત કરવામાં આવશે. આરતી કાન્વર જામનગર મહાનગરપાલિકાની વહીવટી જવાબદારી સંભાળી શહેરના વિકાસ, જાહેર સુવિધાઓ અને નાગરિકોને આપવામાં આવતી વિવિધ સેવાઓને સુચારૂ રીતે આગળ વધારશે.

વહીવટદાર તરીકે તેમની નિમણૂક સાથે શહેરમાં ચાલી રહેલા વિકાસકાર્યો, સફાઈ વ્યવસ્થા, પાણી પુરવઠો, રસ્તા સુધારણા તેમજ અન્ય નાગરિક સુવિધાઓને વધુ અસરકારક રીતે અમલમાં મૂકવા માટે કામગીરી કરવામાં આવશે. શહેરના સર્વાંગી વિકાસ માટે તંત્ર દ્વારા જરૂરી આયોજન અને કામગીરી હાથ ધરાશે.
રાજ્ય સરકારના આ નિર્ણય મુજબ આગામી મહાનગરપાલિકા ચૂંટણી યોજાય ત્યાં સુધી વહીવટદાર દ્વારા મનપાનું સંચાલન કરવામાં આવશે. આ સમયગાળા દરમિયાન શહેરના વિકાસકાર્યો અટકી ન જાય અને નાગરિકોને જરૂરી સેવાઓ સતત મળતી રહે તે માટે તંત્ર સક્રિય રીતે કામગીરી કરશે.