કડીયાણા જંગલમાં વન વિભાગનો સકંજો: જીવિત ત્રણ શેરા અને એક ઘો સાથે શિકારી ઝડપાયો, રિમાન્ડ દરમિયાન મોટા રેકેટનો પર્દાફાશ થવાની શક્યતા

Read Time:2 Minute, 54 Second

રિપોર્ટ: સંજયભાઈ નંદેસરીયા હળવદ:મોરબી તા. 6 જુલાઈ
મોરબી વન વિભાગે વન્યજીવોના ગેરકાયદે શિકાર સામે મહત્વની કાર્યવાહી કરતાં કડીયાણા જંગલ વિસ્તારમાં દરોડો પાડી એક શખ્સને જીવિત ત્રણ શેરા અને એક ઘા (વન્યજીવ) સાથે ઝડપી પાડ્યો છે. પ્રાથમિક તપાસ બાદ આરોપીને હળવદ કોર્ટમાં રજૂ કરવામાં આવ્યો હતો, જ્યાં કોર્ટે વધુ તપાસ માટે એક દિવસના રિમાન્ડ મંજૂર કર્યા છે.વન વિભાગને મળેલી ચોક્કસ બાતમીના આધારે આરએફઓ બી.આર. મકવાણાના માર્ગદર્શન હેઠળ ટીમે કડીયાણા વિસ્તારમાં દરોડો પાડ્યો હતો. કાર્યવાહી દરમિયાન વાલાભાઈ મોહનભાઈ નામના શખ્સ પાસેથી જીવિત ત્રણ શેરા અને એક ઘો કબજે કરવામાં આવ્યા હતા. વન વિભાગે વન્યજીવોને સુરક્ષિત કબજામાં લઈ જરૂરી સંરક્ષણની કાર્યવાહી હાથ ધરી છે.આ મામલે વન્યજીવ સંરક્ષણ કાયદાની જોગવાઈઓ હેઠળ ગુનો નોંધવામાં આવ્યો છે. તપાસ દરમિયાન આરોપી પાસેથી કેટલીક મહત્વપૂર્ણ વિગતો મળી હોવાનું જાણવા મળ્યું છે. જેના આધારે શિકારના સંભવિત નેટવર્ક, અન્ય સંડોવાયેલા વ્યક્તિઓ તથા વન્યજીવોની ગેરકાયદે હેરફેર અંગે વધુ માહિતી બહાર આવવાની શક્યતા વ્યક્ત કરવામાં આવી રહી છે.તાજેતરના સમયમાં વન્યજીવોના ગેરકાયદે શિકાર અને હેરફેરના બનાવો ચિંતાજનક બની રહ્યા છે. આવી પ્રવૃત્તિ માત્ર જૈવવિવિધતા માટે જ નહીં, પરંતુ પર્યાવરણના સંતુલન માટે પણ ગંભીર ખતરો છે. વન વિભાગ દ્વારા સમયસર મળેલી બાતમીના આધારે કરવામાં આવેલી આ કાર્યવાહી વન્યજીવ સંરક્ષણ માટે મહત્વપૂર્ણ માનવામાં આવે છે.

હાલ એક દિવસના રિમાન્ડ દરમિયાન તપાસ અધિકારીઓ આરોપી પાસેથી વધુ પૂછપરછ કરી સમગ્ર નેટવર્ક સુધી પહોંચવાનો પ્રયાસ કરશે. તપાસ પૂર્ણ થયા બાદ જ આ કેસમાં અન્ય કોઈની સંડોવણી છે કે નહીં અને વન્યજીવો ક્યાં પહોંચાડવાના હતા તે અંગે સ્પષ્ટતા થઈ શકશે.વન વિભાગે સ્પષ્ટ કર્યું છે કે વન્યજીવોના શિકાર અને હેરફેર સામે કડક કાર્યવાહી યથાવત રહેશે અને કાયદાનો ભંગ કરનાર કોઈપણ વ્યક્તિ સામે નિયમ મુજબ કાર્યવાહી કરવામાં આવશે.