નાનકડા દિલ, મોટું દાન – વિદ્યાર્થીઓની યાદગાર વિદાય ભેટ

અહેમદાબાદ મિત્ર ન્યુઝ રિપોર્ટ સંજય નંદેસરીયા હળવદ:
શિક્ષણ માત્ર પુસ્તકો પૂરતું નથી, પરંતુ જીવન મૂલ્યો અને સંસ્કારોથી પણ સમૃદ્ધ બને છે—આ વાતનું જીવંત ઉદાહરણ શ્રી બુટવડા પ્રાથમિક શાળામાં જોવા મળ્યું. ધોરણ 8ના વિદ્યાર્થીઓએ પોતાની વિદાયને યાદગાર બનાવતા એક અનોખી પહેલ કરી છે, જે દરેક માટે પ્રેરણારૂપ બની છે.
પ્રાથમિક શિક્ષણ પૂર્ણ કરી હાઈસ્કૂલમાં પ્રવેશ લેવા જઈ રહેલા વિદ્યાર્થીઓએ શાળા પ્રત્યેની કૃતજ્ઞતા વ્યક્ત કરવા માટે પોતાની પોકેટ મની અને બચતમાંથી ફાળો એકત્ર કર્યો. આ સહકારથી તેમણે ₹2,900ની કિંમતનું મિક્સર ગ્રાઇન્ડર શાળાને ભેટ સ્વરૂપે અર્પણ કર્યું,

જે મધ્યાહન ભોજન અને શૈક્ષણિક પ્રવૃત્તિઓમાં ઉપયોગી સાબિત થશે.શાળાના આચાર્યશ્રી પરેશભાઈ પટેલ અને સમગ્ર સ્ટાફે વિદ્યાર્થીઓ ના આ ઉમદા કાર્યને દિલથી બિરદાવ્યું. આ પ્રસંગે આચાર્યશ્રીએ જણાવ્યું કે, “વિદ્યાર્થીઓમાં નાનપણથી જ સામાજિક જવાબદારી અને પોતાની સંસ્થા પ્રત્યે અર્પણ કરવાની ભાવના વિકસે છે, તે ખરેખર ગૌરવની વાત છે.”આ પ્રસંગે શાળા પરિવાર અને એસ.એમ.સી.ના સભ્યોએ વિદ્યાર્થીઓનો આભાર વ્યક્ત કર્યો અને તેમના ઉજ્જવળ ભવિષ્ય માટે શુભકામનાઓ પાઠવી. કાર્યક્રમને વધુ આનંદમય બનાવતા શાળા દ્વારા તમામ વિદ્યાર્થીઓ માટે શ્રીખંડ-પૂરી અને પાપડનું સમૂહ ભોજન પણ યોજાયું.