મોરબી-જેતપર માર્ગ પર કાર દુર્ઘટના: બે યુવાનોના નિધનથી શોકની લાગણી, માર્ગ સુરક્ષા પર ભાર

Read Time:1 Minute, 57 Second

મોરબી જિલ્લાના જેતપર-રાપર માર્ગ વચ્ચે સર્જાયેલી દુઃખદ માર્ગ દુર્ઘટનામાં બે યુવાનોના કરુણ નિધનથી સમગ્ર વિસ્તારમાં શોકની લાગણી વ્યાપી ગઈ છે. મળતી માહિતી મુજબ મોરબીના મહેન્દ્રનગર વિસ્તારના બે યુવાનો કામસર બહાર નીકળ્યા હતા ત્યારે જેતપર અને રાપર ગામની વચ્ચે આવેલા ગોળાઈ પર તેમની કાર અચાનક બેકાબૂ બની પલટી મારી ગઈ હતી અને બાજુમાં આવેલ પાણી ભરાયેલા નાળામાં ખાબકી હતી.અકસ્માત એટલો ગંભીર હતો કે કારમાં સવાર બંને યુવાનોનું ઘટના સ્થળે જ મોત નિપજ્યું હતું. મૃતકોની ઓળખ નિરેશ કાનાણી (ઉ. ૩૪) અને બીપીનલાલ તલસાણિયા (ઉ. ૩૦) તરીકે થઈ છે. અકસ્માતની જાણ થતાં જ સ્થાનિક લોકો અને પોલીસ તંત્ર તાત્કાલિક ઘટનાસ્થળે પહોંચી બચાવ કામગીરી હાથ ધરી હતી. બાદમાં બંને મૃતદેહોને પોસ્ટમોર્ટમ અર્થે મોરબી સરકારી હોસ્પિટલ ખસેડવામાં આવ્યા હતા.પ્રાથમિક તપાસ મુજબ કાર બેકાબૂ બનતાં આ દુર્ઘટના સર્જાઈ હોવાનું માનવામાં આવે છે, જ્યારે ચોક્કસ કારણ અંગે પોલીસ દ્વારા વધુ તપાસ ચાલી રહી છે.આ દુર્ઘટના માર્ગ સલામતી અંગે ફરી એકવાર ચેતવણીરૂપ બની છે. વાહન ચલાવતા સમયે ગતિ નિયંત્રણ, સાવચેતી અને ટ્રાફિક નિયમોનું પાલન કરવું જીવનરક્ષક સાબિત થાય છે. સમાજ અને તંત્ર બંને મળીને માર્ગ સુરક્ષા અંગે વધુ જાગૃતિ લાવે તે સમયની માંગ છે.