વાંકાનેરના પીપળીયા રાજમાં “કસ્વા હોસ્પિટલ લેબોરેટરી”નું મંગલ ઉદ્ઘાટન – ગ્રામ્ય આરોગ્ય ક્ષેત્રે ઐતિહાસિક પગલું

વાંકાનેર તાલુકાના પીપળીયા રાજ ગામે 15 ફેબ્રુઆરીના રોજ “કસ્વા હોસ્પિટલ લેબોરેટરી”નું ભવ્ય અને મંગલ ઉદ્ઘાટન હર્ષોલ્લાસભેર યોજાયું હતું. પૂર્વ ધારાસભ્ય મોહમ્મદ જાવેદ પીરજાદા ના વરદહસ્તે રિબન કાપીને ઉદ્ઘાટન કરવામાં આવ્યું, જે પ્રસંગે ગામમાં આનંદ અને ઉત્સાહનો માહોલ છવાઈ ગયો હતો.કાર્યક્રમની શરૂઆત ઈરફાન પીરઝાદાની દુઆ સાથે થઈ, જેમાં સૌના આરોગ્ય, સુખાકારી અને વિસ્તારના વિકાસ માટે પ્રાર્થના કરવામાં આવી. સાંજે 4:30 કલાકે યોજાયેલા

આ કાર્યક્રમમાં ગામના અગ્રણીઓ, આગેવાનો, આરોગ્યપ્રેમીઓ અને વિવિધ સમાજના પ્રતિનિધિઓ મોટી સંખ્યામાં ઉપસ્થિત રહ્યા હતા. સિંધાવદર ગામના ઈસુભાઈ પરાસરાએ પણ ઉપસ્થિતિ નોંધાવી હતી.આ નવી આરોગ્યસેવા સુવિધા આશરે 6 થી 7 હજાર વસ્તી ધરાવતા પીપળીયા રાજ અને આસપાસના ગામો માટે આશીર્વાદ સમાન સાબિત થશે. અત્યાર સુધી નાની મોટી મેડિકલ તપાસ માટે શહેરનો રુખ કરવો પડતો હતો, પરંતુ હવે ગામના આંગણે જ ગુણવત્તાસભર અને સમયસર મેડિકલ તપાસ ઉપલબ્ધ બનશે.

ડૉ. સાબીર એમ. કડીવાર (B.A.M.S., GAU) ના માર્ગદર્શન હેઠળ હોસ્પિટલ અને લેબોરેટરીમાં આધુનિક મેડિકલ સુવિધાઓ ઉપલબ્ધ રહેશે, જે ગ્રામ્ય વિસ્તારમાં આરોગ્યજાગૃતિ અને સારવારની ગુણવત્તામાં વધારો કરશે.“કસ્વા હોસ્પિટલ લેબોરેટરી”નું પ્રારંભ માત્ર એક ઉદ્ઘાટન નથી, પરંતુ ગ્રામ્ય આરોગ્ય વ્યવસ્થાને મજબૂત બનાવવાનું એક મહત્વપૂર્ણ અને દુરંદેશી પગલું છે. સ્થાનિક નાગરિકોમાં આ સુવિધાને લઈને ખુશી અને આશાનો માહોલ જોવા મળ્યો હતો. ગામના વિકાસ અને જનસેવામાં આ પહેલ ભવિષ્યમાં એક મજબૂત આધારસ્તંભ સાબિત થશે.