સામાજિક એકતા અને સત્યના માર્ગે અડગ રહેવાનો સંદેશ

અંજાર સ્થિત ઇતિહાદુલ મુસ્લેમીન-એ-હિન્દ ટ્રસ્ટ દ્વારા જાહેર કરાયેલા સંદેશમાં સમાજમાં શાંતિ, સૌહાર્દ અને સત્યના માર્ગે આગળ વધવાની અપીલ કરવામાં આવી છે. ટ્રસ્ટે સ્પષ્ટ શબ્દોમાં જણાવ્યું છે કે કોઈપણ વ્યક્તિ વિરુદ્ધ સોશિયલ મીડિયા પર ફેલાતી અફવાઓ અને ગેરસમજો સમાજના હિતમાં નથી.

સંદેશમાં ખાસ કરીને હાજી જુમ્માભાઈ રાયમા વિશે ઉલ્લેખ કરવામાં આવ્યો છે કે તેઓ છેલ્લા ઘણા વર્ષોથી સમાજસેવા અને એકતાના કાર્યોમાં જોડાયેલા છે. વિવિધ સમાજ અને ધર્મના લોકો સાથે સંવાદ સ્થાપી સમાજમાં શાંતિ અને સહકારનું વાતાવરણ જાળવવામાં તેમનું યોગદાન નોંધપાત્ર રહ્યું છે. ટ્રસ્ટે જણાવ્યું છે કે છેલ્લા થોડા દિવસોથી સોશિયલ મીડિયા પર કેટલીક ભ્રામક માહિતી અને વીડિયો વાયરલ થઈ રહ્યા છે, જેનાથી સમાજમાં ગેરસમજ ઊભી થાય તેવી શક્યતા છે. આવા પ્રયાસોને નિંદનીય ગણાવીને સંસ્થાએ સૌને અફવાઓથી દૂર રહેવાની અને સત્યની તપાસ કર્યા વગર કોઈ વાતને આગળ ન ધપાવવાની અપીલ કરી છે. સંદેશમાં વધુમાં જણાવાયું છે કે સમાજના પ્રતિષ્ઠિત અને સેવાભાવી વ્યક્તિઓ વિરુદ્ધ ખોટી અફવાઓ ફેલાવવી એ સમાજને તોડવાના પ્રયાસ સમાન છે. આવા સમયે દરેક જાગૃત નાગરિકની જવાબદારી છે કે શાંતિ, એકતા અને કાયદાનો માર્ગ અપનાવી સમાજને મજબૂત બનાવે.
અંતમાં ટ્રસ્ટ પરિવાર દ્વારા સૌને એકતા જાળવી રાખવા, પરસ્પર વિશ્વાસ વધારવા અને શાંતિપૂર્ણ વાતાવરણમાં વિકાસના માર્ગે આગળ વધવાની અપીલ કરવામાં આવી છે.
“એકતા, શાંતિ અને સત્ય – સમાજની સાચી શક્તિ.”