વસુંધરા દૂધ મંડળી વિવાદે પકડ્યું જોર: ગેરરીતિના આક્ષેપ વચ્ચે તપાસના આદેશ, 10 દિવસમાં અહેવાલની ખાતરી

Read Time:1 Minute, 57 Second

વાંકાનેર તાલુકાના વસુંધરા (જાલસિકા) ગામમાં કાર્યરત દૂધ ઉત્પાદક સહકારી મંડળી સામે ગેરકાયદેસર રીતે કામગીરી ચલાવવાના તથા બોગસ દસ્તાવેજો ના આધારે નોંધણી અને સંચાલન થવાના આક્ષેપો સાથે મામલો ગરમાયો છે. ગ્રામજનો અને સરપંચ દ્વારા લાંબા સમયથી કરવામાં આવતી રજૂઆતો બાદ તાજેતર માં જિલ્લા રજિસ્ટ્રાર સમક્ષ ઉગ્ર રજૂઆત કરવામાં આવી હતી. રજૂઆત દરમિયાન દાવો કરવામાં આવ્યો હતો કે છેલ્લા બે વર્ષથી આ મુદ્દે અનેક વખત લેખિત ફરિયાદો કરવામાં આવી હોવા છતાં કોઈ અસરકારક કાર્યવાહી થઈ નહોતી. જોકે તાજેતરની રજૂઆત બાદ જિલ્લા રજિસ્ટ્રાર દ્વારા સમગ્ર મામલે તપાસના આદેશ આપવામાં આવ્યા હોવાનું અને 10 દિવસમાં તપાસ પૂર્ણ કરીને જરૂરી કાર્યવાહી કરવાની ખાતરી આપવામાં આવી હોવાનું જાણવા મળ્યું છે.

બીજી તરફ, દૂધ મંડળી અથવા સંબંધિત પક્ષ તરફથી આક્ષેપોને લઈને જાહેરમાં કોઈ સત્તાવાર સ્પષ્ટીકરણ સામે આવ્યું નથી. તેથી આક્ષેપોની સત્યતા અંગે અંતિમ નિર્ણય સત્તાવાર તપાસ પૂર્ણ થયા બાદ જ સ્પષ્ટ થઈ શકશે.આ સમગ્ર પ્રકરણે સ્થાનિક સહકારી ક્ષેત્રમાં પારદર્શિતા, જવાબદારી અને નિયમોનુસાર કામગીરી અંગે અનેક પ્રશ્નો ઉભા કર્યા છે. હવે જિલ્લા તંત્રની તપાસમાં શું હકીકતો બહાર આવે છે અને આગળ શું કાર્યવાહી થાય છે તેના પર સ્થાનિક પશુપાલકો તેમજ ગ્રામજનોની નજર મંડાયેલી છે.