મોહરમના પવિત્ર માસમાં કોમી એકતાનું પ્રતીક બન્યું ફેઝ હકક સબીલ કમિટીનું ન્યાજ લંગર

0 0

“‘વર્ષોથી હિન્દુ-મુસ્લિમ ભાઈચારાનો સંદેશ આપતી અનોખી સેવા, હજારો લોકો લઈ રહ્યા છે પ્રસાદનો લાભ”‘

વાંકાનેર, તા. 23
વાંકાનેર શહેરની ભરચક બજાર વિસ્તારમાં આવેલ સલોટ શેરી નાકે ફેઝ હકક સબીલ કમિટી દ્વારા પવિત્ર મોહરમ માસના પ્રથમ ચાંદથી જ ન્યાજ લંગરની સેવા શરૂ કરવામાં આવી છે. દરરોજ અસરની નમાજ બાદ સાંજે છ વાગ્યાથી ઠંડા પીણા તેમજ જુદી જુદી વેરાયટીના ગરમાગરમ અને સ્વાદિષ્ટ વેજિટેરિયન નાસ્તાનું વિતરણ કરવામાં આવે છે.

આ ન્યાજ (પ્રસાદ)નો લાભ બજારમાં ખરીદી કરવા આવતા હિન્દુ-મુસ્લિમ સમાજના લોકો, સ્થાનિક વેપારીઓ તેમજ રાહદારીઓ બહોળી સંખ્યામાં લઈ રહ્યા છે. મોહરમના પવિત્ર દિવસોમાં સેવાભાવ, ભાઈચારો અને માનવતાનો સંદેશ આપતી આ પ્રવૃત્તિ વર્ષોથી સતત ચાલી રહી છે.
કમિટી દ્વારા દર વર્ષે ઋતુ અને હવામાનને ધ્યાનમાં રાખીને ઠંડા પીણા, ચા, દૂધ, કોફી ઉપરાંત ખમણ, ઢોકળા, પૌવા, બટેટા સહિત વિવિધ પ્રકારના તાજા નાસ્તાનું વિતરણ કરવામાં આવે છે. સેવા પાછળનો મુખ્ય ઉદ્દેશ ઈમામ હુસૈન (અ.સ.)ની કરબલાની કુરબાનીને યાદ કરી માનવસેવા અને સહઅસ્તિત્વનો સંદેશ સમાજ સુધી પહોંચાડવાનો છે.
મોહરમ માત્ર શોક અને સ્મરણનો માસ નથી, પરંતુ સત્ય, ન્યાય, ત્યાગ અને માનવતાના મૂલ્યોને જીવનમાં ઉતારવાનો અવસર પણ છે. ફેઝ હકક સબીલ કમિટી દ્વારા કરવામાં આવતી આ સેવા એ મૂલ્યોને જીવંત રાખવાનું ઉત્તમ ઉદાહરણ બની રહી છે. ખાસ કરીને વિવિધ સમાજના લોકો એક જ સ્થળે ભેગા થઈ ન્યાજનો લાભ લેતા હોય તે દૃશ્ય કોમી એકતા અને સામાજિક સૌહાર્દનો સુંદર સંદેશ આપે છે.
વાંકાનેરમાં વર્ષોથી ચાલી આવતી આ પરંપરા આજે માત્ર ધાર્મિક કાર્યક્રમ પૂરતી સીમિત નથી રહી, પરંતુ શહેરની ગંગા-જમની સંસ્કૃતિ અને હિન્દુ-મુસ્લિમ એકતાનું જીવંત પ્રતીક બની ગઈ છે. ફેઝ હકક સબીલ કમિટીની આ નિઃસ્વાર્થ સેવા સમાજમાં પ્રેમ, ભાઈચારો અને માનવતાના મૂલ્યોને વધુ મજબૂત બનાવી રહી છે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %