યા હુસૈનના નારાથી ગુંજ્યું ભમરીયા કુવા: મિત્ર છબીલ કમિટીની નિયાઝ સેવા બની કોમી એકતાનું જીવંત પ્રતીક

0 0

વાંકાનેર, તા. 23 જૂન:
પવિત્ર મોહરમ માસની શરૂઆત સાથે વાંકાનેરના ભમરીયા કુવા વિસ્તારમાં મિત્ર છબીલ કમિટી દ્વારા દર વર્ષની જેમ આ વર્ષે પણ પ્રથમ ચાંદથી સતત નિયાઝ (પ્રસાદ) વિતરણ અને લંગર સેવાનો પ્રારંભ કરવામાં આવ્યો છે. “યા હુસૈન”ના નારાઓ સાથે શરૂ થયેલા આ સેવાયજ્ઞમાં હિન્દુ-મુસ્લિમ યુવાનો ખભેખભા મિલાવીને સેવા આપી રહ્યા છે, જે કોમી એકતા અને ભાઈચારાનું અનોખું ઉદાહરણ પૂરું પાડે છે.મોહરમ માસ દરમિયાન શહીદે કરબલા હઝરત ઇમામ હુસૈનની યાદમાં વિવિધ પ્રકારની નિયાઝનું આયોજન કરવામાં આવે છે. મિત્ર છબીલ કમિટીના કાર્યકરો સવારથી જ તાજા શાકભાજી, ફળો અને જરૂરી સામગ્રીની ખરીદી કરીને બપોરની કાળઝાળ ગરમીમાં પણ સેવાભાવ સાથે રસોઈ તૈયાર કરે છે. રોજે રોજ ઠંડા પીણાં સાથે ગરમાગરમ નાસ્તા અને સ્વાદિષ્ટ વાનગીઓ જેમ કે ચણા-બટેટા, કઢી-ખીચડી, પુલાવ, બટેટા બ્રેડ, બટેટા રગડો સહિતની વિવિધ વાનગીઓનું વિતરણ કરવામાં આવે છે.આ કાર્યક્રમમાં તમામ સમાજના લોકો મોટી સંખ્યામાં જોડાઈને નિયાઝનો લાભ લઈ રહ્યા છે. વર્ષોથી ચાલી આવતી આ પરંપરા માત્ર ધાર્મિક કાર્યક્રમ નથી, પરંતુ સમાજમાં પ્રેમ, સહઅસ્તિત્વ અને માનવસેવાનો સંદેશ આપતું એક પ્રેરણાદાયી અભિયાન બની ગયું છે.

મોહરમનું મહત્વ અને નિયાઝની પરંપરા મોહરમ ઇસ્લામિક વર્ષનો પ્રથમ મહિનો છે, જેમાં કરબલાની ઐતિહાસિક ઘટનાની યાદ તાજી કરવામાં આવે છે. હઝરત ઇમામ હુસૈને સત્ય, ન્યાય અને માનવ મૂલ્યોની રક્ષા માટે આપેલા બલિદાનને યાદ કરતાં વિશ્વભરના મુસ્લિમ સમાજ દ્વારા વિવિધ ધાર્મિક કાર્યક્રમો યોજાય છે. નિયાઝ અને છબીલનું આયોજન પણ એ જ સંદેશને જનમાનસ સુધી પહોંચાડવાનું એક માધ્યમ છે.
વાંકાનેરની મિત્ર છબીલ કમિટીએ વર્ષોથી આ સેવાની પરંપરાને જાળવી રાખી છે. ખાસ વાત એ છે કે આ સેવાકાર્યમાં વિવિધ સમાજના યુવાનોની સક્રિય ભાગીદારી જોવા મળે છે, જે ગંગા-જમુની સંસ્કૃતિને વધુ મજબૂત બનાવે છે.
સ્થાનિક લોકોના જણાવ્યા મુજબ મિત્ર છબીલ કમિટીના કાર્યકરો નિઃસ્વાર્થ ભાવથી સેવા આપી રહ્યા છે, જેના કારણે ભમરીયા કુવા વિસ્તાર મોહરમ દરમિયાન માનવતા, સેવા અને કોમી એકતાની અનોખી રસધારથી તરબતર બની જાય છે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %