કણકોટની સીમમાં ગેરકાયદેસર ખનન પર એલસીબીનો પ્રહાર: ₹55 લાખના વાહનો જપ્ત, બે શખ્સો ઝડપાયા

મોરબી, તા. 7 જૂન: મોરબી જિલ્લામાં ગેરકાયદેસર ખાણ-ખનિજ પ્રવૃત્તિઓ સામે ચાલી રહેલી ઝુંબેશ હેઠળ મોરબી લોકલ ક્રાઇમ બ્રાન્ચ (એલસીબી) અને ખાણ-ખનિજ વિભાગની સંયુક્ત ટીમે વાંકાનેર તાલુકાના કણકોટ ગામની સીમમાં કાર્યવાહી કરીને બે ઇસમોને ઝડપી પાડ્યા છે. સરકારી જમીનમાં ગેરકાયદેસર ખનન અને ખનિજ વહન થતું હોવાની બાતમીના આધારે હાથ ધરાયેલી કાર્યવાહીમાં અંદાજે ₹55 લાખનો મુદ્દામાલ જપ્ત કરવામાં આવ્યો છે.
પોલીસે જાહેર કરેલી વિગતો મુજબ, શ્રી ચિરાગ કોરડીયા, પોલીસ મહાનિરીક્ષક (સરહદ રેન્જ, ભુજ) દ્વારા ગેરકાયદેસર ખનન અને ખનિજ વહન સામે કડક કાર્યવાહી કરવા સૂચના આપવામાં આવી હતી. જેના અનુસંધાને મોરબી જિલ્લા પોલીસ અધિક્ષકના માર્ગદર્શન હેઠળ એલસીબીના ઇન્ચાર્જ પોલીસ ઇન્સ્પેક્ટર આર.સી. ગોહિલ તથા તેમની ટીમે ખાણ-ખનિજ વિભાગના રોયલ્ટી ઇન્સ્પેક્ટરો સાથે સંયુક્ત ઓપરેશન હાથ ધર્યું હતું.

દરોડા દરમિયાન પૃથ્વિરાજસિંહ ભગવતસિંહ ઝાલા અને મહેન્દ્રભાઈ કાળુભાઈ મકવાણા, બંને રહેવાસી કણકોટ, ગેરકાયદેસર ખનિજ પ્રવૃત્તિમાં સંડોવાયેલા હોવાનું સામે આવ્યું હતું. સ્થળ પરથી JCB મશીન (GJ36S52246) અને ટ્રક ડમ્પર (GJ02XX6442) કબજે લેવામાં આવ્યા હતા. બંને વાહનોની કુલ અંદાજિત કિંમત ₹55 લાખ હોવાનું જણાવાયું છે. આ સમગ્ર કામગીરીમાં PSI બી.ડી. ભટ્ટ, PSI વી.જી. માલાણી, પેરોલ-ફર્લો સ્કવોડના સ્ટાફ તેમજ ખાણ-ખનિજ વિભાગના અધિકારીઓએ મહત્વની ભૂમિકા ભજવી હતી. મોરબી-વાંકાનેર પંથકમાં ગેરકાયદેસર ખનનના મુદ્દા વારંવાર ચર્ચામાં રહ્યા છે. પોલીસ અને ખાણ-ખનિજ વિભાગ દ્વારા સતત દરોડા અને જપ્તીની કાર્યવાહી થતી હોવા છતાં આવા કિસ્સાઓ સામે આવતા રહે છે, જે દર્શાવે છે કે ગેરકાયદેસર ખનનનું જાળું હજુ પણ સંપૂર્ણપણે તૂટ્યું નથી.
નિષ્ણાતોના મતે માત્ર વાહનો જપ્ત કરવાથી આગળ વધીને ખનન પાછળના સંચાલકો, આર્થિક લાભાર્થીઓ અને ગેરકાયદેસર પ્રવૃત્તિને પ્રોત્સાહન આપતા તત્વો સુધી પહોંચવું પણ એટલું જ જરૂરી છે. બીજી તરફ, સતત થતી કાર્યવાહીઓ એ સંકેત આપે છે કે તંત્ર હવે આવા ગુનાઓ સામે વધુ સક્રિય અને કડક વલણ અપનાવી રહ્યું છે.હાલ પોલીસે જપ્ત કરાયેલા મુદ્દામાલ સાથે ધોરણસરની કાનૂની કાર્યવાહી શરૂ કરી છે અને સમગ્ર મામલે વધુ તપાસ હાથ ધરવામાં આવી રહી છે.

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %