બંદીવાનોએ પણ માણી બકરી ઈદની ખુશી : મોરબી સબજેલ ખાતે શાંતિ, અમન અને એકતાના સંદેશ સાથે ઈદ-ઉલ-અઝહાની ઉજવણી

Read Time:1 Minute, 37 Second

મોરબી સબજેલ ખાતે ઈદ-ઉલ-અઝહાની પવિત્ર પર્વની ઉજવણી શાંતિ, સૌહાર્દ અને ભાઈચારાના માહોલમાં કરવામાં આવી હતી. જેલમાં રહેલા મુસ્લિમ બંદીવાનોએ વિશેષ નમાઝ અદા કરી દેશ-દુનિયામાં શાંતિ, અમન અને સુખાકારી માટે દુઆઓ માંગી હતી. તહેવારના અવસરે બંદીવાનોમાં પણ આધ્યાત્મિકતા અને ઉમંગનો માહોલ જોવા મળ્યો હતો. માહિતી મુજબ, જેલ પ્રશાસન દ્વારા બંદીવાનોને તહેવારની લાગણી અનુભવાય તે માટે જરૂરી વ્યવસ્થાઓ કરવામાં આવી હતી. મુસ્લિમ બંદીવાનોએ ઈદ-ઉલ-અઝહાની નમાઝ અદા કરી કુરબાની, ત્યાગ અને માનવતા જેવા સંદેશોને આત્મસાત કરવાની પ્રેરણા મેળવી હતી.
તહેવારો માત્ર બહારના સમાજ પૂરતા મર્યાદિત નથી પરંતુ બંદીવાનોને પણ સકારાત્મકતા અને નવી દિશા મળે તે હેતુથી જેલમાં આવા ધાર્મિક પ્રસંગોની ઉજવણી કરવામાં આવતી હોવાનું જાણવા મળે છે. બંદીવાનો વચ્ચે એકતા, ભાઈચારો અને શાંતિનો સંદેશ ફેલાતો જોવા મળ્યો હતો.
મોરબી સબજેલ ખાતે યોજાયેલી આ ઉજવણી એ સંદેશ આપ્યો કે તહેવારો માનવતાને જોડવાનો એક મહત્વનો માધ્યમ છે અને દરેક વ્યક્તિ સુધી ખુશી તથા સકારાત્મકતા પહોંચવી જોઈએ.