હાઈવે સુરક્ષા સામે બેદરકારી? ચોટીલામાં NOC વિના ઉભેલા વીજ થાંભલાઓ આખરે દૂર

રિપોર્ટ : તસવીર સંજય નંદેસરીયા

ચોટીલા પાસેથી પસાર થતા નેશનલ હાઈવે નં. 47 ઉપર પી.જી.વી.સી.એલ દ્વારા ઉભા કરાયેલા વીજ થાંભલાઓ આખરે દૂર કરવામાં આવ્યા છે. આ કાર્યવાહી નાયબ કલેકટર અને સબ ડિવિઝનલ મેજિસ્ટ્રેટ એચ.ટી. મકવાણા દ્વારા આપવામાં આવેલા હુકમ બાદ અમલમાં આવી હતી.
માહિતી મુજબ, વીજ થાંભલાઓ નેશનલ હાઈવે ઓથોરિટી પાસેથી જરૂરી NOC લીધા વગર સીધા હાઈવે માર્ગ ઉપર ઉભા કરવામાં આવ્યા હતા. પરિણામે વાહનચાલકો માટે અકસ્માતનો ભય સતત ઊભો થતો હતો તેમજ જાહેર અવરજવરમાં પણ અવરોધ સર્જાતો હતો. મુદ્દાની ગંભીરતા ધ્યાનમાં રાખીને ચોટીલા પોલીસ ઇન્સ્પેક્ટર જે.એન. સોલંકીએ સબ ડિવિઝનલ મેજિસ્ટ્રેટ કોર્ટમાં ભારતીય નાગરિક ન્યાય સંહિતાની કલમ 152 હેઠળ જાહેર ત્રાસદાયક બાબત તરીકે કેસ રજૂ કર્યો હતો.

કોર્ટ દ્વારા હકીકતો અને જાહેર સલામતીના મુદ્દાને ધ્યાનમાં રાખી પી.જી.વી.સી.એલને શરતી આદેશ આપતા જાહેર માર્ગ પર અવરોધરૂપ બનેલા થાંભલાઓ તાત્કાલિક દૂર કરવા સૂચના આપવામાં આવી હતી. ત્યારબાદ ગતતા. 07/05/2026ના રોજ પી.જી.વી.સી.એલ દ્વારા થાંભલાઓ હટાવવાની કાર્યવાહી પૂર્ણ કરવામાં આવી.આ સમગ્ર ઘટના અનેક મહત્વના પ્રશ્નો ઉભા કરે છે. એક તરફ સરકારી એજન્સીઓ વચ્ચે સંકલનના અભાવનું ચિત્ર સામે આવે છે, તો બીજી તરફ જાહેર સુરક્ષા સંબંધિત કામોમાં પ્રક્રિયાત્મક મંજૂરીઓનું મહત્વ પણ સ્પષ્ટ થાય છે. નેશનલ હાઈવે જેવા વ્યસ્ત માર્ગો પર કોઈપણ પ્રકારનું બાંધકામ કે સુવિધા ઉભી કરતા પહેલા સંબંધિત સત્તાધિકારીઓની મંજૂરી લેવી જરૂરી ગણાય છે.

વિશેષજ્ઞોના મતે, હાઈવે ઉપર ઉભેલા થાંભલાઓ માત્ર ટ્રાફિક માટે જોખમરૂપ નહોતા, પરંતુ રાત્રિના સમયે ગંભીર અકસ્માતનું કારણ પણ બની શકતા હતા. સમયસર કાર્યવાહી થતા સંભવિત દુર્ઘટનાઓ અટકાવવામાં મદદ મળી હોવાનું માનવામાં આવે છે. આ કાર્યવાહી એ સંદેશ પણ આપે છે કે જાહેર હિત અને માર્ગ સલામતીના પ્રશ્નોમાં પ્રશાસન, પોલીસ અને ન્યાયિક તંત્ર સક્રિય બને તો બેદરકારી સામે અસરકારક પગલાં શક્ય બને છે.

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %