મોબાઇલના યુગમાં મૂલ્યલક્ષી સિનેમાનો પાઠ: સરલા શાળાના વિદ્યાર્થીઓએ ‘ભમરડો’ ફિલ્મથી મેળવ્યો જાગૃતિનો સંદેશ

0 0

એશા પારેખ, મુળી : મુળી તાલુકાની સરકારી ઉચ્ચતર માધ્યમિક શાળા, સરલા દ્વારા તા. 02 જુલાઈ, 2026ના રોજ ધોરણ 11 અને 12ના વિદ્યાર્થીઓ માટે સુરેન્દ્રનગર સ્થિત મહાલક્ષ્મી ટોકીઝ ખાતે ગુજરાતી ફિલ્મ “ભમરડો”નું વિશેષ દર્શન આયોજન કરવામાં આવ્યું હતું. આ કાર્યક્રમનો મુખ્ય હેતુ વિદ્યાર્થીઓમાં શિક્ષણ, વૈજ્ઞાનિક અભિગમ, સામાજિક જાગૃતિ અને જીવનમૂલ્યો પ્રત્યે સકારાત્મક વિચારસરણી વિકસાવવાનો હતો.

‘ભમરડો’ માત્ર મનોરંજન પૂરતી ફિલ્મ નથી, પરંતુ ગ્રામ્ય સમાજમાં અંધશ્રદ્ધા, રૂઢિચુસ્ત માન્યતાઓ અને અજ્ઞાન સામે શિક્ષણના પ્રકાશની શક્તિને રજૂ કરતી સંવેદનશીલ કૃતિ છે. ફિલ્મમાં એક શિક્ષક પોતાના સમર્પણ અને પ્રયત્નોથી બાળકો તેમજ ગામલોકોમાં વૈજ્ઞાનિક વિચારધારા, શિક્ષણનું મહત્વ અને પરિવર્તનની ભાવના જગાડે છે. ફિલ્મનો સંદેશ વિદ્યાર્થીઓ માટે પ્રેરણાદાયી અને મૂલ્યલક્ષી રહ્યો.ફિલ્મ નિહાળ્યા બાદ વિદ્યાર્થીઓમાં શિક્ષણ પ્રત્યે વધુ રસ, વૈજ્ઞાનિક અભિગમ, અંધશ્રદ્ધા સામે તર્કસંગત વિચારશક્તિ અને સમાજ પ્રત્યે જવાબદારીની ભાવના વધુ મજબૂત બની હોવાનું શિક્ષકોએ પણ અનુભવ્યું. વિદ્યાર્થીઓએ સમગ્ર ફિલ્મ એકાગ્રતાપૂર્વક નિહાળી અને ફિલ્મના સંદેશને હકારાત્મક રીતે સ્વીકાર્યો. આ કાર્યક્રમમાં શિક્ષિકા જાનકીબેન ગોહિલ તથા સેવક દિલીપભાઈ વિદ્યાર્થીઓ સાથે જોડાયા હતા અને સમગ્ર આયોજનને સફળ બનાવવામાં મહત્વપૂર્ણ સહયોગ આપ્યો હતો. કાર્યક્રમ શાળાના આચાર્ય ભટ્ટાના માર્ગદર્શન હેઠળ સુચારૂ રીતે સંપન્ન થયો.

આજના ડિજિટલ અને સોશિયલ મીડિયાના યુગમાં યુવાપેઢીનો મોટો સમય મોબાઇલ અને ઝડપી મનોરંજન તરફ વળતો જોવા મળે છે. આવા સમયમાં શિક્ષણ, સંસ્કાર, વૈજ્ઞાનિક દૃષ્ટિકોણ અને સામાજિક જવાબદારીનો સંદેશ આપતી ગુજરાતી ફિલ્મોનું મહત્વ અનેકગણું વધી જાય છે. ગુજરાતી ફિલ્મ ઉદ્યોગ હવે માત્ર મનોરંજન સુધી સીમિત રહ્યો નથી, પરંતુ સમાજને વિચારતા કરનારા વિષયો પર ગુણવત્તાસભર ફિલ્મો આપી રહ્યો છે. શાળા દ્વારા આવા શૈક્ષણિક ફિલ્મદર્શનના કાર્યક્રમો વિદ્યાર્થીઓમાં પોતાની ભાષા, સંસ્કૃતિ અને પરંપરા પ્રત્યે ગૌરવની લાગણી વિકસાવે છે. સાથે જ તેઓને જીવનમાં યોગ્ય નિર્ણય લેવાની, અંધશ્રદ્ધાથી દૂર રહેવાની અને શિક્ષણને પરિવર્તનના સૌથી શક્તિશાળી સાધન તરીકે સ્વીકારવાની પ્રેરણા આપે છે. શિક્ષણ અને સિનેમાનો આ સમન્વય આજના સમયમાં વિદ્યાર્થીઓના સર્વાંગી વિકાસ માટે એક પ્રશંસનીય અને અનુસરવા યોગ્ય પહેલ કહી શકાય.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %