વિકાસ સામે વિશ્વાસનો પ્રશ્ન જેતપરમાં ખેડૂતોનો આરપારનો સંઘર્ષ, હવે સરકાર અને કંપની બંને માટે અગ્નિપરીક્ષા

0 0

મોરબી: મોરબી તાલુકાના જેતપર ગામે ખાનગી પાવર કંપની સામે ખેડૂતોનું આંદોલન હવે નિર્ણાયક તબક્કામાં પહોંચી ગયું છે. જમીન સંપાદન, હાઈટેન્શન વીજ પોલ, પ્રદૂષણ અને યોગ્ય વળતરના મુદ્દે છેલ્લા લગભગ 20 દિવસથી ખેડૂતો ધરણા અને ઉપવાસ આંદોલન ચલાવી રહ્યા છે. રવિવારે આંદોલન વધુ ઉગ્ર બનતા જેતપર-મોરબી હાઈવે પર હજારો ખેડૂતો ચક્કાજામમાં જોડાયા હતા. અન્ય જિલ્લાઓમાંથી પણ ખેડૂત સંગઠનોના પ્રતિનિધિઓ પહોંચતા આંદોલનને રાજ્યવ્યાપી સમર્થન મળતું જોવા મળ્યું.ખેડૂતોનો આક્ષેપ છે કે ખાનગી કંપનીએ પૂરતું વળતર અને સંમતિ વિના તેમની ખેતીલાયક જમીન પર કામ આગળ વધાર્યું છે. બીજી તરફ પ્રદૂષણ અને પાકને થયેલા નુકસાન અંગે પણ યોગ્ય વળતર મળવું જોઈએ તેવી તેમની માંગ છે. ખેડૂતોનું કહેવું છે કે અનેક રજૂઆતો છતાં સંતોષકારક અને લેખિત ઉકેલ ન મળતા હવે આંદોલન વધુ તેજ બનાવવાની ફરજ પડી છે.આંદોલન દરમિયાન હાઈવે બ્લોક થતાં વાહનવ્યવહારને અસર પહોંચી હતી. કાયદો અને વ્યવસ્થા જળવાઈ રહે તે માટે પોલીસનો ચુસ્ત બંદોબસ્ત ગોઠવવામાં આવ્યો હતો. સ્થિતિ પર વહીવટી તંત્ર સતત નજર રાખી રહ્યું છે. જેતપરનો મુદ્દો હવે માત્ર એક ગામનો પ્રશ્ન રહ્યો નથી. વિકાસલક્ષી પ્રોજેક્ટો અને ખેડૂતોના જમીન અધિકાર વચ્ચે સંતુલન કેવી રીતે જળવાય તે સમગ્ર રાજ્ય માટે મહત્વનો પ્રશ્ન બની રહ્યો છે. એક તરફ ઔદ્યોગિક વિકાસ અને વીજ ઈન્ફ્રાસ્ટ્રક્ચરની જરૂરિયાત છે

, તો બીજી તરફ ખેતી પર નિર્ભર પરિવારો માટે યોગ્ય વળતર, પારદર્શક પ્રક્રિયા અને પર્યાવરણીય સુરક્ષા પણ એટલી જ જરૂરી છે.
આંદોલનને અન્ય જિલ્લાઓના ખેડૂતોનું સમર્થન મળવાથી સ્પષ્ટ સંકેત મળે છે કે ખેડૂતોમાં જમીન અને વળતર સંબંધિત મુદ્દાઓ અંગે અસંતોષ વ્યાપક છે. જો સમયસર સંવાદ અને વિશ્વાસપૂર્ણ સમાધાન નહીં થાય તો આવા પ્રશ્નો વધુ વિસ્તારોમાં પણ ઉગ્ર સ્વરૂપ ધારણ કરી શકે છે.વિકાસના દાવાઓ ત્યારે જ અર્થપૂર્ણ બને જ્યારે તેની સાથે પ્રભાવિત ખેડૂતોને ન્યાય, યોગ્ય વળતર અને વિશ્વાસ પણ મળે. જેતપરની ઘટના સરકાર, કંપનીઓ અને નીતિ નિર્માતાઓ માટે એવો સંદેશ આપે છે કે વિકાસની ગતિ સાથે સંવેદનશીલતા અને પારદર્શિતા જળવાશે તો જ લાંબા ગાળે જનવિશ્વાસ ટકી શકશે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %