કન્યા કેળવણી મહોત્સવ અને શાળા પ્રવેશોત્સવમાં 400 વિદ્યાર્થીનીઓનો ઉત્સાહભેર સહભાગ

Read Time:3 Minute, 7 Second

“‘વાંકાનેર ગર્લ્સ હાઈસ્કૂલ ખાતે શિક્ષણ જાગૃતિનો પ્રેરણાદાયી કાર્યક્રમ, મહાનુભાવોના હસ્તે વિદ્યાર્થીઓનું સન્માન”‘

વાંકાનેર, તા. 24 જૂન વાંકાનેરની ગર્લ્સ હાઈસ્કૂલ ખાતે આજે કન્યા કેળવણી મહોત્સવ અને શાળા પ્રવેશોત્સવનું ભવ્ય આયોજન કરવામાં આવ્યું હતું. કાર્યક્રમમાં બાલવાટિકા થી ધોરણ-11 સુધીની અંદાજે 400 વિદ્યાર્થીનીઓએ ઉત્સાહભેર ભાગ લઈને શિક્ષણ પ્રત્યેની પોતાની પ્રતિબદ્ધતા વ્યક્ત કરી હતી. કાર્યક્રમમાં ગુજરાત સરકારના શ્રમ અને રોજગાર મંત્રી તેમજ વાંકાનેરના ધારાસભ્ય જીતુભાઈ સોમાણી વિશેષ ઉપસ્થિત રહ્યા હતા. તેમની સાથે વાંકાનેર નગરપાલિકા પ્રમુખ રમેશભાઈ વોરા, સંગીતાબેન વોરા, માર્ગ અને મકાન પંચાયત મોરબીના ડી.આર. કાર્યપાલક એન્જિનિયર સહિતના મહાનુભાવો હાજર રહ્યા હતા. મહાનુભાવોના આગમન સમયે સાલ ઓઢાડી, પુષ્પગુચ્છ અર્પણ કરી તેમજ ફૂલોના વરસાદ સાથે ઉષ્માભર્યું સ્વાગત કરવામાં આવ્યું હતું. કાર્યક્રમ દરમિયાન વિદ્યાર્થીઓ, વાલીઓ અને શિક્ષકોમાં વિશેષ ઉત્સાહ જોવા મળ્યો હતો.

મંત્રી કાંતિભાઈ અમૃતિયા અને ધારાસભ્ય જીતુભાઈ સોમાણીએ પોતાના સંબોધનમાં જણાવ્યું હતું કે શિક્ષણ એ સમાજના સર્વાંગી વિકાસનો પાયો છે અને દીકરીઓનું શિક્ષણ પરિવાર તેમજ રાષ્ટ્રના ઉજ્જવળ ભવિષ્ય માટે અત્યંત જરૂરી છે. તેમણે સરકાર દ્વારા શિક્ષણ ક્ષેત્રે અમલમાં મૂકાયેલી વિવિધ યોજનાઓની માહિતી આપી વિદ્યાર્થીઓને નિયમિત અભ્યાસ અને ઉચ્ચ લક્ષ્યાંકો માટે પ્રેરિત કર્યા હતા.કાર્યક્રમ દરમિયાન નવીન પ્રવેશ મેળવનાર વિદ્યાર્થીનીઓનું સન્માન કરવામાં આવ્યું હતું તેમજ શિક્ષણ ક્ષેત્રે ઉત્કૃષ્ટ કામગીરી કરનાર શિક્ષકો અને વિદ્યાર્થીઓને અભિનંદન પાઠવવામાં આવ્યા હતા.આ પ્રસંગે શિક્ષણ પ્રત્યે જાગૃતિ, કન્યા શિક્ષણના મહત્વ અને શાળામાં શત-પ્રતિશત પ્રવેશના સંકલ્પ સાથે સમગ્ર કાર્યક્રમ સકારાત્મક અને પ્રેરણાદાયી માહોલમાં સંપન્ન થયો હતો. કાર્યક્રમે દીકરીઓના શિક્ષણને વધુ પ્રોત્સાહન આપવાની સાથે સમાજમાં શિક્ષણ પ્રત્યેનો વિશ્વાસ અને જાગૃતિ વધુ મજબૂત બનાવી હતી.