ત્રણ દીકરીઓ પછી દીકરાની અપેક્ષા કે શિક્ષિત સમાજની માનસિક ગરીબી?

0 0

આ ઘટનાને માત્ર એક પારિવારિક વિવાદ કે પોલીસ ફરિયાદ તરીકે જોવાને બદલે, આજના શિક્ષિત સમાજ સામે ઊભા થયેલા ગંભીર પ્રશ્ન તરીકે સમજવાની જરૂર છે. શિક્ષણ, સરકારી નોકરી અને સામાજિક પ્રતિષ્ઠા હોવા છતાં જો પરિવારની અંદર સંવાદ, સમાનતા અને સંવેદનશીલતાનો અભાવ રહે તો સંબંધોમાં તિરાડ પડવી સ્વાભાવિક બની જાય છે. એવી જ કંઈક આ ઘટના કહી રહી છે!? મોરબીની શ્રીરામ સોસાયટીમાં રહેતી અને મોટા દહીસરા પ્રાથમિક શાળામાં સરકારી શિક્ષિકા તરીકે ફરજ બજાવતી પરિણીતાએ પોતાના પતિ, સાસુ-સસરા, જેઠ-જેઠાણી અને નણંદ વિરુદ્ધ શારીરિક તથા માનસિક ત્રાસની ફરિયાદ નોંધાવતા અનેક સવાલો ઊભા થયા છે.ફરિયાદ મુજબ, લગ્નજીવન દરમિયાન નાની-નાની બાબતો, ઘરકામ તેમજ ત્રણ દીકરીઓ હોવા છતાં દીકરો ન હોવાના મુદ્દે વારંવાર મેણાટોણા મારવામાં આવતા હતા. પરિવારના સભ્યો એકબીજાને ચડામણી કરીને ફરિયાદીને માનસિક અને શારીરિક રીતે હેરાન કરતા હોવાના આક્ષેપો સાથે મોરબી મહિલા પોલીસ સ્ટેશનમાં ફરિયાદ નોંધાઈ છે.

પોલીસે ફરિયાદના આધારે ગુનો નોંધી કાયદેસરની કાર્યવાહી હાથ ધરી છે. જોકે, આરોપો સાબિત થવા હજુ બાકી હોવાથી તમામ પક્ષોને કાયદાની નજરે સમાન અને નિર્દોષ માનવામાં આવશે.શિક્ષિત પરિવારમાં પણ સંવાદનો અભાવ કેમ? આ ઘટના ફરી એકવાર સાબિત કરે છે કે ડિગ્રી અને શિક્ષણ વચ્ચે મોટો તફાવત છે. શાળામાં બાળકોને સમાનતા, મહિલા સશક્તિકરણ અને બંધારણીય મૂલ્યોનો પાઠ ભણાવતો સમાજ જ્યારે પોતાના ઘરમાં જ દીકરી-દીકરાના ભેદભાવથી ઉપર નથી ઉઠી શકતો, ત્યારે શિક્ષણના સાચા હેતુ પર પ્રશ્નાર્થ ઊભો થાય છે. “શિક્ષિત બનો, સંગઠિત બનો, એક બનો” જેવા સૂત્રો માત્ર દિવાલો પર લખાયેલા શબ્દો બની રહે છે, જો પરિવારમાં પરસ્પર સન્માન, સહાનુભૂતિ અને સમજણનો અભાવ હોય.ઈગો, અપેક્ષાઓ કે સંયુક્ત પરિવારની બદલાતી વાસ્તવિકતા? આજના સમયમાં અનેક પરિવારોમાં આર્થિક સ્વતંત્રતા અને શિક્ષણ વધ્યું છે, પરંતુ સાથે સાથે અહંકાર, અતિશય અપેક્ષાઓ અને પરસ્પર સંવાદનો અભાવ પણ વધી રહ્યો છે.સંયુક્ત પરિવારોમાં વ્યક્તિગત સ્વતંત્રતા અને પરંપરાગત માન્યતાઓ વચ્ચેનું અંતર ઘણીવાર વિવાદનું કારણ બને છે. જ્યારે પરિવારના સભ્યો એકબીજાની લાગણીઓને સમજવાને બદલે પોતાની વાતને જ સાચી માનવા લાગે, ત્યારે મતભેદો કાયદાકીય લડાઈ સુધી પહોંચી જાય છે. સમાજ માટે શીખવાનો સમય દીકરી અને દીકરા વચ્ચેનો ભેદભાવ માત્ર કાયદેસર ગુનો જ નહીં, પરંતુ સામાજિક રીતે પણ ગંભીર માનસિકતા છે. દીકરીઓને ભાર નહીં, પરંતુ પરિવારની શક્તિ તરીકે સ્વીકારવાનો સમય આવી ગયો છે. આવી ઘટનાઓ સમાજને યાદ અપાવે છે કે સાચું શિક્ષણ માત્ર નોકરી મેળવવાનું સાધન નથી, પરંતુ માનવતા, સમાનતા અને સંબંધોને સાચવવાની કળા છે.પરિવારના વિવાદો પોલીસ મથક સુધી પહોંચે તે પહેલાં સંવાદ, કાઉન્સેલિંગ અને પરસ્પર સમજણ દ્વારા ઉકેલવાનો પ્રયાસ થવો જોઈએ. કારણ કે જ્યારે સંબંધો તૂટે છે, ત્યારે તેની સૌથી મોટી અસર બાળકો અને આખા સમાજ પર પડે છે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %