ચોમાસું માથે અને વિકાસના કામોથી હળવદમાં ટ્રાફિક તંત્ર ઠપ્પ: નાગરિકો પૂછે છે – આ કેવો વિકાસ મોડલ?

0 0

રિપોર્ટ : સંજય નંદેસરિયા, હળવદ: હળવદ નગરપાલિકા દ્વારા શહેરના વિવિધ વિસ્તારોમાં રોડ તોડવાની અને વિકાસલક્ષી કામગીરી શરૂ કરવામાં આવી છે. પરંતુ ચોમાસાની શરૂઆત પહેલાં શરૂ થયેલા આ કામો હવે નાગરિકો માટે ભારે મુશ્કેલીનું કારણ બની રહ્યા છે. વિકાસના દાવાઓ વચ્ચે હળવદવાસીઓ ટ્રાફિક, ગટરના પાણી અને અવ્યવસ્થિત આયોજનથી ત્રાહિમામ પોકારી ઉઠ્યા છે.

હળવદ તાલુકાના નાના-મોટા અંદાજે 75 ગામોના લોકો રોજિંદી ખરીદી, સરકારી કામકાજ અને વ્યવસાય માટે હળવદ શહેરમાં આવે છે. શહેરની મુખ્ય બજાર માત્ર આશરે 10 ફૂટ પહોળી હોવાથી સામાન્ય દિવસોમાં પણ ટ્રાફિકની સમસ્યા રહેતી હોય છે. હવે એક તરફ રોડ બંધ, બીજી તરફ ખોદકામ અને ત્રીજી તરફ વાહનોની અવરજવર વધતા પરિસ્થિતિ વધુ જટિલ બની ગઈ છે.

સ્થાનિક વેપારીઓ અને નાગરિકોના જણાવ્યા મુજબ બજારમાં વાહન લઈ જવું લગભગ અશક્ય બની ગયું છે. લોકોને પોતાના વાહનો એક કિલોમીટર જેટલા દૂર પાર્ક કરીને પગપાળા બજારમાં જવું પડે છે. જેના કારણે વડીલો, મહિલાઓ અને ખરીદી માટે આવતા ગ્રામ્ય વિસ્તારના લોકોને ભારે હાલાકી ભોગવવી પડી રહી છે.નાગરિકોનો આક્ષેપ છે કે વિકાસના કામો શરૂ કરતાં પહેલાં વૈકલ્પિક માર્ગોની વ્યવસ્થા, ટ્રાફિક ડાયવર્ઝન પ્લાન અને જાહેર સૂચનાઓ આપવામાં આવી નથી. પરિણામે શહેરનું દૈનિક કામકાજ ખોરવાઈ રહ્યું છે અને વેપાર-ધંધા પર પણ તેની સીધી અસર પડી રહી છે.
બીજી તરફ શહેરના કેટલાક વિસ્તારોમાં ગટરના પાણીની સમસ્યા પણ ગંભીર બની છે. ચોમાસું નજીક હોવા છતાં ગટર વ્યવસ્થામાં સુધારાના અભાવે રસ્તાઓ પર ગંદુ પાણી ભરાવાની ફરિયાદો ઉઠી રહી છે. સ્થાનિકોનું કહેવું છે કે વરસાદ શરૂ થતાં જ પરિસ્થિતિ વધુ વિકટ બની શકે છે. વિકાસલક્ષી કામો શહેર માટે જરૂરી છે, પરંતુ યોગ્ય આયોજન વિના કરવામાં આવતી કામગીરી નાગરિકો માટે મુશ્કેલીઓ ઊભી કરે છે. ખાસ કરીને ચોમાસા પહેલાં રસ્તા તોડીને કામ અધૂરાં રાખવામાં આવે તો વરસાદી પાણી, કાદવ અને ટ્રાફિક જામની સમસ્યા વધુ ગંભીર બની શકે છે. હવે સવાલ એ ઊભો થાય છે કે શું નગરપાલિકાએ વિકાસના કામો માટે સમય, આયોજન અને નાગરિક સુવિધાઓને ધ્યાનમાં લીધી છે? હળવદવાસીઓ માંગ કરી રહ્યા છે કે તંત્ર તાત્કાલિક ટ્રાફિક વ્યવસ્થા સુધારે, ગટર સમસ્યાનું નિરાકરણ લાવે અને વિકાસના કામો સમયમર્યાદામાં પૂર્ણ કરે. વિકાસ માત્ર રોડ તોડવાથી નહીં, પરંતુ નાગરિકોને ઓછામાં ઓછી મુશ્કેલી પડે તે રીતે આયોજનબદ્ધ કામગીરીથી સાબિત થાય છે. હવે જોવાનું એ રહેશે કે હળવદને ખરેખર વિકાસ મોડલ બનાવવાના દાવા હકીકતમાં કેટલા સફળ સાબિત થાય છે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %