જર્જરિત વીજ થાંભલાઓનો ખતરો: પ્રિમોન્સૂન કામગીરી વચ્ચે તંત્રની તૈયારી સામે ઊભા થયા પ્રશ્નો

અમદાવાદના રામાપીરના ટેકરા વિસ્તારમાં પાર્ક કરેલી પેસેન્જર રિક્ષા પર અચાનક જર્જરિત વીજ થાંભલો ધરાશાયી થવાની ઘટના માત્ર એક અકસ્માત નથી, પરંતુ શહેરી માળખાકીય વ્યવસ્થાની વાસ્તવિક સ્થિતિનો અરીસો છે. સદનસીબે આ ઘટનામાં કોઈ જાનહાનિ થઈ નથી, પરંતુ જો રિક્ષામાં મુસાફરો બેઠા હોત અથવા રસ્તા પરથી લોકો પસાર થઈ રહ્યા હોત તો પરિણામ ગંભીર બની શકતું હતું.

ચોમાસાની શરૂઆત પહેલાં દર વર્ષે પ્રિમોન્સૂન કામગીરીના દાવાઓ કરવામાં આવે છે. વૃક્ષોની ડાળીઓ કાપવી, વીજ લાઈનોની તપાસ, જોખમી થાંભલાઓનું સમારકામ અને બદલાવવાની કામગીરીના અહેવાલો જાહેર થાય છે. છતાં આવી ઘટના એ સવાલ ઊભો કરે છે કે શું કામગીરી ખરેખર જમીન પર થઈ રહી છે કે પછી માત્ર કાગળો અને ફોટોગ્રાફ્સ પૂરતી જ સીમિત છે?
ઘણા વિસ્તારોમાં વર્ષો જૂના વીજ થાંભલાઓ કાટ ખાઈ ચૂક્યા છે, કેટલાક થાંભલાઓ તિરાડયુક્ત છે અને અનેક સ્થળોએ વીજ વાયરો પણ જોખમી હાલતમાં જોવા મળે છે. સ્થાનિક લોકો વારંવાર રજૂઆતો કરતા હોવા છતાં ઘણી વખત કાર્યવાહી ચોમાસા કે અકસ્માત બાદ જ થતી હોવાનું જોવા મળે છે. આવી સ્થિતિમાં પ્રજાનો પ્રશ્ન સ્વાભાવિક છે કે દુર્ઘટના પહેલા નિવારણ કેમ નહીં?

હવામાન વિભાગ દ્વારા આગામી દિવસોમાં વરસાદ, પવન અને ગાજવીજની આગાહી વચ્ચે વીજ માળખાની મજબૂતાઈ વધુ મહત્વની બની જાય છે. જર્જરિત થાંભલાઓ અને ઢીલા વાયર માત્ર વીજ પુરવઠા માટે નહીં પરંતુ માનવજીવન માટે પણ સીધો ખતરો બની શકે છે. અગાઉ પણ વિવિધ વિસ્તારોમાં વીજ વાયર તૂટવા, શોર્ટ સર્કિટ અને આગની ઘટનાઓ સામે આવી ચૂકી છે, જેના કારણે જાળવણી વ્યવસ્થાને લઈને પ્રશ્નો ઉઠ્યા હતા.

ખરા અર્થમાં પ્રજાલક્ષી પ્રિમોન્સૂન કામગીરીનો અર્થ માત્ર રિપોર્ટ રજૂ કરવાનો નથી, પરંતુ જોખમી વીજ થાંભલાઓની ઓળખ, સમયસર બદલાવ, નિયમિત સર્વે અને નાગરિકોની ફરિયાદોનું ઝડપી નિરાકરણ છે. રામાપીરના ટેકરાની આ ઘટના તંત્ર માટે ચેતવણી સમાન છે કે ચોમાસા પહેલાં દેખાવ નહીં પરંતુ પરિણામલક્ષી આયોજનની જરૂર છે.
આખરે, પ્રજાને સુરક્ષિત રાખવાની જવાબદારી માત્ર વરસાદ પછીની કાર્યવાહીથી નહીં પરંતુ દુર્ઘટના બનતા પહેલાં જોખમોને દૂર કરવાથી પૂર્ણ થાય છે. રિક્ષા પર પડેલો થાંભલો જાણે મૌન ભાષામાં કહી રહ્યો હોય કે “અમારું પણ પ્રિમોન્સૂન કરો”, નહીં તો આગામી વખતે નુકસાન માત્ર વાહનનું નહીં પરંતુ માનવજીવનનું પણ હોઈ શકે.

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %