અમદાવાદના રાણીપમાં નશાખોર બે શખ્સોનો હંગામો : રિક્ષામાં તોડફોડ, સ્થાનિકો પર હુમલાથી ભયનો માહોલ

અમદાવાદ શહેરના રાણીપ વિસ્તારમાં જાહેર રોડ પર દારૂના નશામાં ધૂત બે શખ્સોએ ભારે આતંક મચાવતા વિસ્તારમાં અફરાતફરીનો માહોલ સર્જાયો હતો. મળતી માહિતી મુજબ, બંને શખ્સોએ પહેલા એક રિક્ષામાં તોડફોડ કરી હતી અને ત્યારબાદ રસ્તા પરથી પસાર થતા સ્થાનિક લોકો સાથે ઉગ્ર વર્તન કરતાં બેફામ મારપીટ શરૂ કરી દીધી હતી. અચાનક બનેલી આ ઘટનાને કારણે સ્થાનિકોમાં ભય અને ગભરાટ ફેલાયો હતો. રસ્તા પરથી પસાર થતા લોકો પોતાની સલામતી માટે દોડધામ કરતા જોવા મળ્યા હતા. ઘટનાસ્થળે થોડા સમય માટે ભારે ગેરવ્યવસ્થા સર્જાતા વાહન વ્યવહાર પણ ખોરવાયો હતો.
જાહેર માર્ગ પર સર્જાયેલા હોબાળાને કારણે વિસ્તારમાં કલાકો સુધી ટ્રાફિક જામની સ્થિતિ ઉભી થઈ હતી, જેના કારણે વાહનચાલકોને ભારે હાલાકીનો સામનો કરવો પડ્યો હતો. સ્થાનિકોના જણાવ્યા અનુસાર, બંને શખ્સો નશાની હાલતમાં બેફામ બની ગયા હતા અને કોઈને પણ નિશાન બનાવી રહ્યા હતા.

ઘટનાની જાણ થતાં પોલીસ તાત્કાલિક ઘટનાસ્થળે પહોંચી પરિસ્થિતિ કાબૂમાં લેવાના પ્રયાસો હાથ ધર્યા હતા. સમગ્ર મામલે વધુ તપાસ હાથ ધરવામાં આવી રહી હોવાનું જાણવા મળ્યું છે. જોકે, સત્તાવાર રીતે પોલીસ તરફથી વધુ વિગતો જાહેર થવાની રાહ જોવાઈ રહી છે.