રક્ષાબંધનના પાવન પર્વે 181 મહિલા હેલ્પલાઇન ટીમે વૃદ્ધાશ્રમમાં ઉજવણી કરી, ફરજને પણ આપ્યું પ્રાધાન્ય

1 0

મોરબી: રક્ષાબંધન એટલે માત્ર ભાઈના કાંડે રાખડી બાંધવાનો તહેવાર નહીં, પરંતુ લાગણી, સુરક્ષા, સંવેદના અને સંબંધોની જવાબદારીનું પવિત્ર પ્રતીક છે. આ ભાવનાને સાર્થક કરતાં 181 મહિલા હેલ્પલાઇનની મોરબી ટીમ દ્વારા રક્ષાબંધનના પાવન પર્વે ફરજની સાથે માનવસેવાનો અનોખો સંદેશ આપવામાં આવ્યો હતો. મોરબી શોભેશ્વર રોડ પર આવેલા શ્રી કાઠિયાવાડ નિરાશ્રિત બાલાશ્રમ, રાજકોટ સંચાલિત વૃદ્ધાશ્રમ ખાતે ટીમના સભ્યોએ સાથે મળી સાદગીપૂર્ણ રીતે રક્ષાબંધનની ઉજવણી કરી હતી. વૃદ્ધાશ્રમમાં રહેતા વડીલો સાથે સમય વિતાવી ટીમે તહેવારની ખુશીઓ વહેંચી હતી. આ પ્રસંગે તહેવારની ઉજવણીમાં પણ માનવતા અને સંવેદનાને કેન્દ્રસ્થાને રાખવાનો સુંદર પ્રયાસ જોવા મળ્યો હતો. ખાસ વાત એ રહી કે રક્ષાબંધનના પર્વે પણ 181 મહિલા હેલ્પલાઇન ટીમ પોતાની ફરજ પર અડગ રહી હતી. મહિલાઓને મુશ્કેલીના સમયે તાત્કાલિક મદદ, માર્ગદર્શન અને સુરક્ષા મળી રહે તે માટે ટીમ સતત કાર્યરત રહી હતી. રક્ષાબંધન ભાઈ-બહેનના રક્ષણના વચનનું પ્રતીક છે ત્યારે 181 મહિલા હેલ્પલાઇનની કામગીરી પણ સમાજમાં મહિલાઓને સુરક્ષા અને સહાય આપવાના આ જ ભાવને વિસ્તૃત કરે છે.

એક તરફ વડીલો સાથે લાગણીનું બંધન અને બીજી તરફ ફરજના મોરચે મહિલાઓની સુરક્ષા—આ બંને પ્રવૃત્તિઓએ રક્ષાબંધનના પર્વને સાચા અર્થમાં સાર્થક બનાવ્યો હતો. તહેવારની ખુશીઓ પોતાની પૂરતી મર્યાદિત ન રાખી સમાજના જરૂરિયાતમંદ અને વડીલો સુધી પહોંચાડવી તથા ફરજને પ્રથમ સ્થાન આપવું—181 મહિલા હેલ્પલાઇન ટીમની આ પહેલે ‘રાખડીથી આગળ વધીને જવાબદારીના બંધન’નો સુંદર સંદેશ આપ્યો છે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %