વરસાદી સંકટમાં માનવતાની મહેક: જીવના જોખમે બીમાર યુવકને બચાવી મોરબી તાલુકા પોલીસ બની જીવનરક્ષક

0 0

“‘જમાદાર ફિરોજભાઈ સુમરા અને રાઈટર વનરાજભાઈ સહિતની ટીમની સમયસર કામગીરીને ગ્રામજનોએ બિરદાવી; “પોલીસ માત્ર કાયદાની નહીં, માનવતાની પણ રક્ષક” હોવાનો સંદેશ”‘

રિપોર્ટ: આરીફ દિવાન, મોરબી: મોરબી જિલ્લામાં શનિવારે પડેલા ધોધમાર વરસાદે અનેક વિસ્તારોમાં વિકટ પરિસ્થિતિ ઊભી કરી હતી. નીચાણવાળા વિસ્તારો પાણીમાં ગરકાવ થતાં અનેક પરિવારો મુશ્કેલીમાં મુકાયા હતા. આવી સંજોગોમાં મોરબી તાલુકા પોલીસે માત્ર ફરજ જ નહીં, પરંતુ માનવતા, સંવેદના અને સેવાભાવનું જીવંત ઉદાહરણ પૂરું પાડતાં પાણીમાં ફસાયેલા બીમાર યુવકનો જીવ બચાવી સમાજમાં પોલીસ પ્રત્યેનો વિશ્વાસ વધુ મજબૂત કર્યો છે.

મોરબી તાલુકાના તળાવિયા શનાળા ગામના કોળીવાસ વિસ્તારમાં રહેતા જયેશભાઈ ભગતભાઈ કગથરા પોતાના વૃદ્ધ પિતા સાથે રહે છે. ભારે વરસાદને કારણે સમગ્ર વિસ્તાર પાણીમાં ઘેરાઈ જતાં તેઓ બહાર નીકળી શકતા નહોતા. તે દરમિયાન તેમની તબિયત વધુ લથડતાં સ્થિતિ ગંભીર બની હતી. ઘટનાની જાણ થતાં જ મોરબી તાલુકા પોલીસ સ્ટેશનના જમાદાર ફિરોજભાઈ સુમરા, રાઈટર વનરાજભાઈ સહિતની પોલીસ ટીમ કોઈ વિલંબ કર્યા વિના સ્થળ પર પહોંચી હતી.પાણીના તેજ પ્રવાહ અને જોખમી પરિસ્થિતિ વચ્ચે પણ પોલીસ ટીમે પોતાના જીવની પરવા કર્યા વિના હિંમત, સૂઝબૂઝ અને ફરજનિષ્ઠા સાથે રેસ્ક્યુ હાથ ધર્યું. જયેશભાઈને સુરક્ષિત બહાર કાઢી તાત્કાલિક 108 એમ્બ્યુલન્સની મદદથી પ્રાથમિક સારવાર અપાવી વધુ સારવાર માટે મોરબી સિવિલ હોસ્પિટલ ખાતે ખસેડવામાં આવ્યા હતા.
આ સમગ્ર ઘટનાએ સાબિત કરી દીધું કે સાચા અર્થમાં પોલીસ માત્ર કાયદો અને વ્યવસ્થાની જાળવણી પૂરતી મર્યાદિત નથી, પરંતુ સંકટની ક્ષણોમાં લોકો માટે આશાનો આધાર અને જીવનરક્ષક તરીકે પણ કાર્ય કરે છે. વરસાદી આપત્તિ જેવી મુશ્કેલ પરિસ્થિતિમાં મોરબી તાલુકા પોલીસની સતર્કતા અને ઝડપી કામગીરીને સ્થાનિક ગ્રામજનોએ હૃદયપૂર્વક બિરદાવી હતી.તાજેતરના સમયમાં પોલીસની કામગીરી માત્ર ગુનાઓ અટકાવવા પૂરતી સીમિત રહી નથી. કુદરતી આપત્તિ, અકસ્માત કે માનવતાવાદી સંકટમાં પણ પોલીસ સૌથી પહેલાં મદદ માટે પહોંચતી સંસ્થા બની રહી છે. મોરબી તાલુકા પોલીસની આ કામગીરી એ જ વાતનો પુરાવો છે કે પ્રજાની સુરક્ષા સાથે માનવ જીવન બચાવવું પણ પોલીસની સર્વોચ્ચ પ્રાથમિકતા છે.

જમાદાર ફિરોજભાઈ સુમરા અને રાઈટર વનરાજભાઈ સહિતની ટીમે દેખાડેલી નિષ્ઠા, હિંમત અને સંવેદનશીલતા સમગ્ર પોલીસ દળ માટે પ્રેરણારૂપ છે. આવી કામગીરી પોલીસ અને પ્રજા વચ્ચે વિશ્વાસનો સેતુ વધુ મજબૂત બનાવે છે અને સમાજમાં સેવા, સમર્પણ તથા માનવતાના મૂલ્યોને નવી દિશા આપે છે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %