મોરબીમાં એસઓજીની કાર્યવાહી નશાના કારોબાર સામે પોલીસનો પ્રહાર, છતાં પડકાર યથાવત્

0 0

મોરબી જિલ્લામાં નશીલા પદાર્થોના ગેરકાયદેસર વેપાર સામે પોલીસ દ્વારા સતત કાર્યવાહી કરવામાં આવી રહી છે. તાજેતરમાં એસઓજી ટીમે ત્રાજપર ચોકડી નજીકથી મેફેડ્રોન નામના માદક પદાર્થ સાથે એક શખ્સને ઝડપી પાડી કાયદેસરની કાર્યવાહી હાથ ધરી છે. પોલીસની આ કાર્યવાહી સમાજમાં વધતા નશાના દૂષણ સામે એક મહત્વપૂર્ણ પગલું માનવામાં આવી રહી છે.પોલીસ મહાનિરીક્ષક, સરહદી રેન્જ ભુજ અને મોરબી જિલ્લા પોલીસ અધિક્ષકના માર્ગદર્શન હેઠળ એસઓજી ટીમને મળેલી બાતમીના આધારે ત્રાજપર ચોકડી પાસે આવેલા મેલડી માતાજીના મંદિર નજીક દરોડો પાડવામાં આવ્યો હતો.

દરમિયાન રાજસ્થાનના ઝાલાવાડ જિલ્લાના રહેવાસી કાલુલાલ પુરાલાલ ગોયલને મેફેડ્રોન પાવડર સાથે ઝડપી પાડવામાં આવ્યો હતો. પોલીસે આરોપી પાસેથી અંદાજે ૪૯.૩૮૦ ગ્રામ મેફેડ્રોન પાવડર અને એક મોબાઇલ ફોન મળી કુલ રૂ. ૧.૫૩ લાખથી વધુનો મુદ્દામાલ કબજે કર્યો છે. આ મામલે એનડિપીએસ એક્ટની કલમ ૮(સી), ૨૧(બી) અને ૨૯ હેઠળ ગુનો નોંધી વધુ તપાસ મોરબી સિટી બી ડિવિઝન પોલીસને સોંપવામાં આવી છે. મોરબી સહિત ગુજરાત ના વિવિધ જિલ્લાઓમાં મેફેડ્રોન જેવા કૃત્રિમ નશીલા પદાર્થોનું વધતું જતું ચલણ ચિંતાનો વિષય બની રહ્યું છે. ખાસ કરીને આંતરરાજ્ય નેટવર્ક મારફતે આવા પદાર્થોનો પુરવઠો થતો હોવાની આશંકા વધતી જાય છે.આ ઘટનામાં આરોપી રાજસ્થાનનો રહેવાસી હોવાને કારણે નશાના વેપારનું જાળું રાજ્યની સરહદો પાર સુધી ફેલાયેલું હોવાની સંભાવના નકારી શકાય નહીં. આવી સ્થિતિમાં માત્ર સ્થાનિક સ્તરે દરોડા પૂરતા નથી, પરંતુ વિવિધ રાજ્યોની પોલીસ એજન્સીઓ વચ્ચે વધુ સઘન સંકલન જરૂરી બને છે.
નશીલા પદાર્થોનો વેપાર માત્ર કાયદો અને વ્યવસ્થાનો મુદ્દો નથી, પરંતુ તે યુવાધનના ભવિષ્ય, પરિવાર વ્યવસ્થા અને સામાજિક સ્વાસ્થ્ય સાથે પણ સીધો જોડાયેલો પ્રશ્ન છે.

સરળ કમાણીની લાલચ અને વધતી માંગ આવા ગેરકાયદેસર કારોબારને પ્રોત્સાહન આપે છે.પોલીસ દ્વારા કરવામાં આવતી કાર્યવાહી પ્રશંસનીય છે, પરંતુ સાથે જ સમાજના તમામ વર્ગો, શૈક્ષણિક સંસ્થાઓ અને વાલીઓએ પણ જાગૃત બની યુવાનોને નશાના દૂષણથી દૂર રાખવા માટે સક્રિય ભૂમિકા ભજવવાની જરૂર છે.
નશા વિરોધી લડાઈ ત્યારે જ સફળ બની શકે જ્યારે કાયદાકીય કાર્યવાહી સાથે જનજાગૃતિ અને સામાજિક જવાબદારીનો સમન્વય સાધવામાં આવશે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %