આંતરરાષ્ટ્રીય મહિલા દિવસ નિમિત્તે મોરબીમાં નારીશક્તિનો ગૌરવવંતો સન્માન સમારોહ

તસવીર રિપોર્ટ:આરીફ દિવાન મોરબી: આંતરરાષ્ટ્રીય મહિલા દિવસના પાવન અવસરે મોરબી જિલ્લામાં મહિલા સશક્તિકરણ અને નારીશક્તિના સન્માન માટે એક ભવ્ય મહિલા સંમેલનનું આયોજન કરવામાં આવ્યું હતું. મોરબી જિલ્લાના શ્રી કમલમ ખાતે યોજાયેલ આ કાર્યક્રમમાં રાજકીય, સામાજિક અને જાહેર જીવનમાં યોગદાન આપનાર બહેનોનું સન્માન કરી નારીશક્તિને પ્રોત્સાહિત કરવામાં આવ્યું હતું.

આ પ્રસંગે મુખ્ય વક્તા તરીકે જિગ્નાબેન પંડ્યાએ પોતાના વિચારો રજૂ કરતાં જણાવ્યું હતું કે આજના આધુનિક યુગમાં મહિલાઓ દરેક ક્ષેત્રમાં પુરુષો સાથે ખભે ખભા મિલાવી આગળ વધી રહી છે. રાજકારણ, શિક્ષણ, વેપાર, સમાજસેવા સહિતના અનેક ક્ષેત્રોમાં મહિલાઓએ પોતાની પ્રતિભા સાબિત કરી છે અને સમાજના વિકાસમાં મહત્વપૂર્ણ યોગદાન આપી રહી છે.

કાર્યક્રમમાં મોરબી જિલ્લા ભાજપના પ્રમુખ જયંતીભાઈ રાજકોટિયા, ગુજરાત પ્રદેશ મહિલા મોરચાના પૂર્વ અધ્યક્ષ દીપિકાબેન સરડવા, મોરબી જિલ્લા મહિલા મોરચાના અધ્યક્ષ જયશ્રીબેન સિયોજીયા, મોરબી જિલ્લા ભાજપના મહામંત્રી નિર્મલભાઈ જારિયા, ચતુરભાઈ મકવાણા સહિત વિવિધ મોરચાના આગેવાનો અને કાર્યકરો મોટી સંખ્યામાં ઉપસ્થિત રહ્યાં હતાં.

આ પ્રસંગે વિવિધ ક્ષેત્રોમાં ઉત્તમ કામગીરી કરનાર નારીશક્તિને શાલ, સન્માનપત્ર અને સ્મૃતિચિહ્ન આપી સન્માનિત કરવામાં આવી હતી. મહિલાઓના ઉત્સાહ અને આત્મવિશ્વાસને વધારવા માટે આવા કાર્યક્રમો સમાજમાં પ્રેરણારૂપ બની રહે છે.આંતરરાષ્ટ્રીય મહિલા દિવસ માત્ર ઉજવણીનો દિવસ નથી, પરંતુ મહિલાઓના અધિકારો, સન્માન અને સમાનતાના સંદેશને વધુ મજબૂત બનાવવાનો અવસર છે. મોરબીમાં યોજાયેલ આ મહિલા સંમેલન દ્વારા નારીશક્તિ પ્રત્યે આદર વ્યક્ત કરી સમાજમાં સકારાત્મક સંદેશ પહોંચાડવાનો પ્રયત્ન કરવામાં આવ્યો હતો.