દોષના ટોપલા નહીં, પ્રજાના પ્રશ્નોના ઉકેલ આપો!

2 0

“‘રાજકારણમાં વાદવિવાદ ચાલે, પરંતુ વિકાસ અને પ્રજાહિત અટકવું ન જોઈએ”‘

લોકશાહી એટલે માત્ર ચૂંટણી, સત્તા અને વિરોધ નહીં. લોકશાહીનો સાચો અર્થ છે—પ્રજાના પ્રશ્નોને સાંભળવા, સમજવા અને સમયસર ઉકેલવા. આજે દેશ અને રાજ્ય સામે મોંઘવારી, બેરોજગારી, આર્થિક મુશ્કેલીઓ, ખેતીના પ્રશ્નો, સરકારી કચેરીઓમાં અપૂરતો સ્ટાફ અને જાહેર સુવિધાઓની અછત જેવા અનેક પડકારો ઊભા છે. આવા સમયે એકબીજાના માથે દોષના ટોપલા ઢોળવાથી પ્રજાને શું મળશે?
પ્રજાને ભાષણ નહીં, પરિણામ જોઈએ છે! સત્તા હોય કે વિરોધપક્ષ—પ્રજા બંનેની માલિક શાસક પક્ષને સત્તા મળેલી છે એટલે તેની જવાબદારી વધારે છે, પરંતુ વિરોધપક્ષની ભૂમિકા પણ એટલી જ મહત્વપૂર્ણ છે. સરકારની ભૂલો દર્શાવવી, પ્રજાના પ્રશ્નો ઉઠાવવા અને યોગ્ય વિકલ્પ સૂચવવો એ વિરોધપક્ષનું કર્તવ્ય છે. પરંતુ વિરોધ માત્ર વિરોધ માટે ન હોવો જોઈએ. કોઈ રસ્તો તૂટેલો હોય, પાણીની સમસ્યા હોય, સરકારી હોસ્પિટલમાં સુવિધા ઓછી હોય કે કચેરીમાં કર્મચારીઓની અછત હોય—ત્યાં પક્ષના ઝંડા કરતાં પ્રજાનો પ્રશ્ન મોટો હોવો જોઈએ. સરકારી કચેરીઓમાં મહેકમ વધારવાનો સમય
આધુનિક યુગમાં સરકાર ડિજિટલ સેવાઓની વાત કરે છે, પરંતુ જો કચેરીમાં પૂરતો સ્ટાફ જ ન હોય તો સામાન્ય નાગરિકે ધક્કા ખાવા પડે છે. સરકાર અને વહીવટી તંત્રએ વિભાગવાર ખાલી જગ્યાઓની સમીક્ષા કરી જરૂરિયાત મુજબ નિયમિત ભરતી અને મંજૂર મહેકમમાં સુધારો-વધારો કરવો જોઈએ. આઉટસોર્સ કર્મચારીઓ પણ વ્યવસ્થાનો મહત્વનો હિસ્સો છે. તેમને સમયસર પગાર, યોગ્ય વેતન અને મોંઘવારીને અનુરૂપ પગારવધારો મળે તે માટે નક્કર નીતિ જરૂરી છે.
મંથલી સંકલન બેઠક—માત્ર ફોટો સેશન નહીં!
જિલ્લા કક્ષાએ કલેક્ટર સહિતના અધિકારીઓ, ધારાસભ્યો, સાંસદો, સ્થાનિક સ્વરાજ્યના પ્રતિનિધિઓ અને સંબંધિત વિભાગોના જવાબદાર અધિકારીઓની નિયમિત મંથલી સંકલન બેઠક યોજવી જોઈએ.
પરંતુ બેઠક પછી પ્રજાને ખબર પડવી જોઈએ કે—
ગયા મહિને કેટલા પ્રશ્નો ઉકેલાયા? કેટલા કામો અધૂરા છે?
કયા કામ માટે કેટલો સમય નક્કી થયો?
કયા વિભાગની જવાબદારી છે?આગામી બેઠક સુધીમાં શું પૂર્ણ કરવાનું છે? જો આ કામગીરીનો પ્રગતિ અહેવાલ મીડિયા અને પ્રજા સમક્ષ મૂકવામાં આવે તો લોકશાહીમાં પારદર્શિતા અને જવાબદારી બંને મજબૂત બનશે. રાજકીય ગુણાકાર કરો, ભાગાકાર નહીં!
રાજકારણમાં મતભેદ સ્વાભાવિક છે, પરંતુ પ્રજાના વિકાસમાં મનભેદ કેમ? રસ્તો કોઈ પક્ષનો નથી. પાણી કોઈ પક્ષનું નથી. હોસ્પિટલ, શાળા, વીજળી, રોજગાર અને જાહેર સુવિધાઓ કોઈ પક્ષની મિલકત નથી.
પ્રજાના પૈસાથી થતા વિકાસમાં પક્ષીય ભાગાકાર નહીં, જનહિતનો ગુણાકાર થવો જોઈએ.સત્તાપક્ષ અને વિરોધપક્ષ સાથે બેસીને જો કોઈ સમસ્યાનો ઉકેલ લાવી શકે તો તેમાં કોઈની હાર નથી—જીત માત્ર પ્રજાની છે.

કાર્યકરો અને મતદારોની નારાજગી અવગણવી નહીં દરેક રાજકીય પક્ષે પોતાના ઘરનું પણ આત્મમંથન કરવું જરૂરી છે. કાર્યકરો નાસીપાસ કેમ થાય છે? સ્થાનિક નેતૃત્વ અને કાર્યકરો વચ્ચે અંતર કેમ વધે છે? મતદાર પોતાની વાત કોને કહે? આ પ્રશ્નો માત્ર એક પક્ષ માટે નહીં, પરંતુ દરેક રાજકીય પક્ષ માટે ચિંતનના વિષય છે. પક્ષની વિચારધારા મજબૂત રહે તે જરૂરી છે, પરંતુ તેની સાથે પ્રજાનો વિશ્વાસ મજબૂત રહે તે વધુ જરૂરી છે.કુદરતી આફતોમાંથી શીખવાનું છે વરસાદ, પૂર, રસ્તાઓ પર પાણી, તૂટેલા રસ્તા, વીજળીની સમસ્યાઓ અને અન્ય કુદરતી આપત્તિઓ આપણને દર વર્ષે નવી શીખ આપી જાય છે. આપત્તિના સમયે રાહત કામગીરી કરવી જરૂરી છે, પરંતુ સાચું આયોજન ત્યારે કહેવાય જ્યારે આપત્તિમાંથી શીખ લઈને આગામી વર્ષ માટે કાયમી ઉકેલ તૈયાર કરવામાં આવે. દર વર્ષે એ જ સમસ્યા અને એ જ ફરિયાદ—આ વિકાસનું મોડેલ બની શકે નહીં. વિકાસનો અર્થ માત્ર સિમેન્ટ-કોંક્રીટ નથી
આજના નેતૃત્વને વિકાસની વ્યાખ્યા પણ વિસ્તૃત કરવાની જરૂર છે.માનવ કલ્યાણ સાથે પશુ-પક્ષી, પર્યાવરણ, વૃક્ષો, પાણીના સ્ત્રોતો અને કુદરતી સંપત્તિનું રક્ષણ પણ વિકાસનો જ ભાગ છે.

સાચા નેતાની પરખ તેના ભાષણથી નહીં, પરંતુ સંકટના સમયે તે કેટલો સંવેદનશીલ અને નિર્ણયક્ષમ બને છે તેનાથી થાય છે.નવા રાજકીય વિકલ્પો કેમ જન્મે છે?ભારતના રાજકીય ઇતિહાસે એક વાત વારંવાર સાબિત કરી છે—જ્યારે પ્રજાને લાગે કે સ્થાપિત રાજકીય વ્યવસ્થા તેના પ્રશ્નો સાંભળતી નથી, ત્યારે નવા રાજકીય વિચારો અને વિકલ્પો માટે જગ્યા ઊભી થાય છે.નવા પક્ષો કે નવા રાજકીય પ્રવાહોનો ઉદય માત્ર રાજકીય ગણિત નથી; તેની પાછળ ઘણી વખત પ્રજાની અપેક્ષા, અસંતોષ અને પરિવર્તનની ઈચ્છા હોય છે. આથી દરેક પક્ષે વિચારવું જોઈએ કે આપણી નીતિ અને કામગીરીથી પ્રજા જોડાઈ રહી છે કે દૂર જઈ રહી છે? હવે સમય છે આત્મમંથનનો!
આજે દેશને એકબીજાને દોષ આપનારા નેતાઓ કરતાં સમસ્યાનો ઉકેલ શોધનારા નેતાઓની જરૂર છે. પ્રજાને એવી વ્યવસ્થા જોઈએ છે જ્યાં સરકારી કચેરીમાં કામ માટે વારંવાર ધક્કા ન ખાવા પડે.
યુવાનોને રોજગારની દિશા જોઈએ છે. ખેડૂતોને ન્યાયી વ્યવસ્થા જોઈએ છે. મધ્યમવર્ગને મોંઘવારીમાંથી રાહત જોઈએ છે.
શહેરોને સારી સુવિધાઓ જોઈએ છે.ગામડાંને રસ્તા, પાણી, વીજળી અને આરોગ્ય જોઈએ છે.આ પ્રશ્નોના જવાબ દોષારોપણથી નહીં, આયોજનથી મળશે. રાજકીય પક્ષો બદલાતા રહે, સરકારો આવતી-જતી રહે, પરંતુ પ્રજા અને રાષ્ટ્ર સર્વોપરી રહેવા જોઈએ.
અંતિમ વાત રાજકારણ કરો, પણ પ્રજાના ભોગે નહીં. વિરોધ કરો, પણ વિકાસના ભોગે નહીં. સત્તા ચલાવો, પણ જવાબદારી ભૂલશો નહીં. પક્ષની વિચારધારા રાખો, પણ પ્રજાની લાગણી ન ગુમાવો.
આજના સમયમાં સૌથી મોટું સૂત્ર એક જ હોવું જોઈએ—
“દોષના ટોપલા ઓઢાડવાનું બંધ કરો, પરિસ્થિતિને પ્રાધાન્ય આપો અને પ્રજાલક્ષી કાર્યને ગતિ આપો.” કારણ કે અંતે ચૂંટણીમાં પક્ષ નહીં, પ્રજા નિર્ણય કરે છે; અને ઇતિહાસમાં ભાષણ નહીં, કામગીરી યાદ રહે છે.

About Post Author

Aarif B Diwan Phone: 9723563374

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %